Testijiet fuq il-vaċċin sospiżi wara li jimrad parteċipant

Johnson & Johnson ħabbret li b’mod temporanju kienet qed twaqqaf il-provi kliniċi fuq il-vaċċin tagħha kontra l-COVID-19 wara li parteċipant f’dawn il-provi marad b’mod mhux spjegat. Dan ifisser iżjed dewmien f’wieħed mill-eqqel sforzi sabiex tkun kontrollata l-pandemija globali.

Il-marda ta’ dan il-parteċipant issa qed tkun studjata u evalwata minn bord ta’ monitoraġġ indipendenti ta’ data u sigurtà kif ukoll mit-tobba kliniċi tal-kumpanija, skont stqarrija maħruġa mill-istess Johnson & Johnson.

Johnson & Johnson, li nhar it-Tlieta mistennija tirraporta r-riżultati finanzjarji tagħha tal-aħħar tlett xhur, qalet li waqfien bħal dan huwa normali waqt trials kbar bħal din, li kapaċi jinkludu għexieren ta’ eluf ta’ nies. Il-kumpanija qalet li din il-“waqfa fl-istudju” waqt l-għoti tad-doża tal-vaċċin kienet differenti minn “waqfien regolatorju” li ġieli jintalab mill-awtoritajiet tas-saħħa. Dan il-każ huwa biss pawża.

Għaldaqstant, din il-pawża hija simili għal dik li għamlet AstraZeneca Plc dan l-aħħar. F’Settembru, AstraZeneca waqqfet serje ta’ late-stage trials tal-vaċċin esperimentali tagħha, li qed ikun żviluppat mal-Università ta’ Oxford, minħabba marda inspjegabbli f’parteċipant li kien qed jieħu sehem fl-istudju fir-Renju Unit.

Għalkemm minn dak iż-żmien l‘hawn, it-trials fir-Renju Unit, il-Brażil, l-Afrika t’Isfel u l-Indja komplew, it-trial fl-Istati Uniti jinsab wieqaf sakemm issir reviżjoni regolatorja.