Srateġija komuni għall-coronavirus mhux għeluq tal-fruntieri – il-PE

A man wearing protective mask is seen in silhouette as he looks at an information board at Kuala Lumpur International Airport, after Malaysia’s government closed its borders due to the spread of the coronavirus disease (COVID-19), in Sepang
REUTERS/Lim Huey Teng

Read in English.

L-UE teħtieġ strateġija komuni biex titrażżan l-imxija tal-COVID-19 u jkun evitat li Stati Membri jimmarkaw bħala żoni ħomor lill-pajjiżi oħrajn tal-UE. Dan qalu l-Kumitat tal-Parlament  Ewropew għall-Ambjent, is-Saħħa Pubblika u s-Sigurtà tal-Ikel waqt laqgħa ma’ Dr Andrea Ammon, Direttriċi taċ-Ċentru Ewropew għall-Prevenzjoni u l-Kontroll tal-Mard (ECDC) wara li hi pprovdiet aġġornament tas-sitwazzjoni dwar il-pandemija fl-UE u l-ħidma tal-ECDC biex tindirizzaha.

Dr Ammon innutat kif fl-aħħar ħames ġimgħat kien hemm żieda ta’ infezzjoni fl-Unjoni, bir-rata titla’ għal madwar 46 pazjent kull 100,000 persuna fil-ġimgħa. Madankollu s-sitwazzjoni kienet varja bejn pajjiż u ieħor, minn żewġ każijiet għal 176 każ kull 100,000 ruħ. 

Id-Direttriċi spjegat li ż-żieda fil-medja kienet dovuta wkoll għal numru ferm akbar ta’ testijiet li qed isiru madwar l-Ewropa, hekk kif dawn telgħu għal firxa ta’ bejn 173 u 6,000 kull 100,000 persuna fil-ġimgħa. Sostniet li każijiet li persuna tkun infettata għat-tieni darba bil-COVID-19 kienu rari ħafna u s-sintomi kienu inqas b’saħħithom.

Waqt l-intervent tagħha, Ammon qalet li kien qed jitħejja protokoll dwar l-influwenza staġjonali għall-Istati Membri li se jkun applikabbli mill-1 ta’ Ottubru, li se jinkludi enfasi għal żieda fit-tilqim tal-gruppi vulnerabbli.

Bżonn ta’ ttestjar armonizzat fuq livell Ewropew

Il-Membri Parlamentari Ewropew esprimew id-diżappunt tagħhom għall-fatt li m’hemmx metodu komuni ta’ kif jingħaddu l-każijiet fil-pajjiżi differenti u għall-fatt li kull pajjiż qed iwettaq it-testijiet skont ir-rakkomandazzjonijiet tal-aġenziji xjentifiċi nazzjonali, mingħajr ebda koordinazzjoni.

Min-naħa tagħha Dr Ammon wissiet ukoll dwar il-miżinformazzjoni dwar it-tilqim tal-COVID-19 u anke l-fatt li bosta żgħażagħ jeżitaw milli jieħdu tilqim li jista’ jkun meħtieġ għalihom, waqt li sostneit li l-ECDC qed tagħmel minn kollox biex tispira fiduċja f’dan il-qasam.