Ritratti: Roly-poly tal-irkotta bl-ispinaċi u l-ġobon Cheddar

Riċetta u ritratti: Joseph A Cachia

Ingredjenti

230g għaġina sfiljurata

250g irkotta

nofs tazza ħalib

6 mgħaref semolina

250g spinaċi ffriżata

100g ġobon Cheddar

melħ

bżar iswed

ġulġlien

Metodu

Ħalli l-ispinaċi barra biex jinżel is-silġ. Wara agħsru sew biex tneħħilu l-ilma kollu.

Poġġi l-irkotta f’kazzola. Żid il-ħalib, is-semolina, il-bżar u l-melħ. Saħħan fuq nar moderat il-ħin kollu tħawwad sakemm il-ħalib jonqos u l-l-irkotta tagħqad. Ħalliha tiksaħ.

Ifrex l-għaġina u ferrex l-ispinaċi fuqha iżda tasalx sat-trufijiet tagħha.

Fuq l-ispinaċi ferrex l-irkotta u fuq l-irkotta ferrex il-ġobon Cheddar.

Irrombla l-għaġina bil-galbu.

Xarrab ftit il-wiċċ bl-ilma u ross il-ġulġlien.

Daħħal fil-forn f’temperatura ta’ 190˚Ċ għal madwar 20 minuta u sakemm tara li r-roly-poly ħa kulur dehbi.

Tista’ sservi sħuna jew kiesħa.