Qorti Taljana tissospendi d-digriet ta’ Salvini; Open Arms jitħalla jidħol fl-ibħra

Twitter / Open Arms /Francesco Gentico

Read in English.

Il-bastiment tat-tfittxija u salvataġġ Open Arms se jidħol fl-ibħra territorjali Taljani viċin ta’ Lampedusa hekk kif it-Tribunal Amministrattiv ta’ Lazio tahom raġun.

Open Arms ilu bla port sigur għal dawn l-aħħar 13-il jum b’madwar 150 persuna abbord il-bastiment.

L-għaqda ppreżentat rikors quddiem il-Qorti Taljana kontra d-digriet tal-Ministru tal-Intern Taljan Matteo Salvini.

Il-Qorti Taljana ddeċidiet li tħalli l-bastiment jidħol fl-ibħra territorjali Taljani, hekk kif qieset li s-sitwazzjoni hi waħda gravi u urġenti. Il-Qorti sostniet li hemm bżonn ta’ azzjoni immedjata. Dan wara li l-Qorti rat rapporti mediċi u psikoloġiċi ta’ dawk li huma abbord il-bastiment.

Id-deċiżjoni tal-Qorti ma tindikax f’liema port jistgħu jidħlu iżda l-għaqda Proactiva qalet li se tkun qed issalpa lejn Lampedusa.

Id-digriet ta’ Salvini jista’ jwassal għal multi sa €50,000 lill-kaptan tal-bastiment, lis-sid u lill-operatur jekk dan jidħol fl-ibħra Taljani mingħajr permess.

Matul il-jum tal-Erbgħa l-Prim Ministru Taljan Giuseppe Conte kiteb lil Salvini biex jitniżżlu l-minuri minn fuq Open Arms.

Salvini rreaġixxa li se jkun qed jiffirma ordni li twaqqaf lil Open Arms milli tniżżel l-immigranti l-Italja. Huwa qal li fis-sigħat li ġejjin se jkun qed jiffirma “le”. Fuq Twitter Salvini kiteb “Għiduli jekk hux stramba l-biċċa, fejn bastiment Spanjol f’ibħra Maltin jista’ jirrikorri għand il-Qrati Taljani biex iniżżel l-immigranti fl-Italja.”

Aqra iktar:

1 mejjet u ieħor fil-periklu tal-mewt; l-AFM ittellagħhom minn dingi

Żewġ nisa u familthom ġew evakwati minn Open Arms lejn Malta

L-immigranti jibqgħu bejn sema u ilma; Malta tgħid ‘le’

Malta lesta tieħu 39 immigrant; deċiżjoni li qed toħloq tensjoni – Open Arms

Richard Gere jappella lil Salvini biex jieqaf “jiddemonizza” lill-immigranti u jgħinhom