Moderna tfittex l-approvazzjoni għall-vaċċin tagħha kontra l-Covid-19

Read in English.

Il-kumpanija farmaċewtika Moderna irrapurtat li r -riżultati finali tal-analiżi tal-vaċċin għall-Covid-19 li qed tiżviluppa huwa 94.1% effettiv, u li ħadd mill-parteċipanti li rċevew il-vaċċin ma’ żviluppa każ serju.

Il-kumpanija Amerikana issottomettiet ir-riżultati tat-testijiet tagħha lill-awtoritajiet Amerikani u Ewropew bil-għan li l-vaċċin, li jġib l-isem mRNA-1273, jiġi approvat b’urġenza. Il-Food and Drug Administration tal-Istati Uniti mistennija tikkunsidra tagħmel dan fil-laqgħa tagħha fis-17 ta’ Diċembru.

Il-ġimgħa l-oħra, Moderna laħqet ftehim mal-Kummissjoni Ewropea biex jinxtraw 160 miljun dożi tal-vaċċin. Il-Kummissjoni laħqet ftehim simili ma’ kumpaniji oħra li qed jiżviluppaw vaċċin għall-Covid-19 sabiex id-dożi jaslu għand l-istati membri Ewropew mill-aktar fis possibli.

Kien hemm 196 parteċipant fit-testijiet tal-Moderna li żviluppaw il-Covid-19. Madankollu, 185 minn dawn kienu ingħataw il-placebo, b’11-il każ biss irrapurtat fost dawk li rċevew il-vaċċin.

Skont ir-riżultati li ppublikat il-Moderna, ma jidhirx li kien hemm differenzi fl-effettività tal-vaċċin abbażi ta’ età jew oriġini etnika.