Aġġornata: “Mhux xogħol l-AD li jqajjem diskussjoni dwar l-abort” – Cassola

L-eks Kap tal-Alternattiva Demokratika Arnold Cassola sostna li mhux post l-AD li jqajjem diskussjoni dwar l-abort. Dan qalu f’ittra mibgħuta lis-Segretarju Ġenerali tal-partit Ralph Cassar, b’reazzjoni għal dak li qalet il-kandidata għal-MEP tal-AD Mina Tolu fuq Facebook fejn talbet għal dibattitu rispettuż dwar l-abort.

Cassola sostna li jaqbel ma’ Tolu li huwa xokkanti li taqra ċertu theddid u kummenti odjużi kontra min għandu opinjonijiet differenti u huwa favur l-abort. Minkejja dan insista, li l-Alternattiva Demokratika ma għandux iqajjem din id-diskussjoni, speċjalment minħabba li ma hemm l-ebda mandat demokratiku tal-membri tal-partit dwar dan.

Hu sostna li kien diġà ġibed l-attenzjoni tal-Kap kurrenti, Carmel Cacopardo f’Settembru tal-2017 meta kien ġie elett fil-kariga tiegħu. Sostna li meta mbagħad f’Novembru tal-2018 ġie aċċettat bħala kandidat għal MEP tal-AD, kien qal b’mod ċar li dan is-suġġett huwa wieħed mil-linji ħomor tiegħu.

Insista li dak iż-żmien Cacopardo kien tah l-assigurazzjoni tiegħu li l-partit ma jaqbilx mal-idea tal-legalizzazzjoni tal-abort. Qal li minkejja li d-dikjarazzjoni ta’ Mina kienet magħmula bl-aħjar intenzjonijiet, qed toħloq konfużjoni u ambigwità fost l-elettorat Malti. Hu tenna li huwa totalment kontra l-abort minbarra fil-każ li s-saħħa u l-ħajja tal-omm ikunu f’periklu.

Temm jgħid li qed jitlob lill-Alternattiva Demokratika joħroġ dikjarazzjoni immedjata fejn tiddisassoċja ruħha mill-fehmiet personali ta’ Tolu u tafferma b’mon ċar li hi kontra l-abort.

Fil-filmat tagħha, Tolu qalet li bosta politiċi, kandidati u partit jibżgħu jitkellmu fejn jidħol l-abort u s-saħħa riproduttiva. Insistiet li din hija frustranti u inaċċettabbli.

#InclusiveEurope – One last taboo.

It would be easy to say nothing and keep going. I think that a lot of politicians, candidates and parties are scared to say anything when it comes to abortion and reproductive health, and this is frustrating and unacceptable.Enough with these taboos and stigmas. They are so harmful – harmful to individuals, to families, to entire communities – and when it comes to abortion in Malta – the taboo and stigma is harmful to an entire country.I know something about the harm caused by taboos by growing up queer in Malta – and it hurts to think that similar kind of taboo is harming others.So, let's stop silencing others.

Posted by Mina Tolu on Friday, February 15, 2019

B’reazzjoni għal dan fi stqarrija, l-Alternattiva Demokratika qalet li l-pożizzjoni tagħha fuq l-abort baqgħet kontra. L-AD qalet li fl-istess waqt temen fil-bżonn ta’ dibattitu rispettuż li jixraq f’soċjetà demokratika bħal ma qalet Mina Tolu fil-kummenti tagħha.