L-istaġun jilħaq il-qofol għall-atleti żgħażagħ bl-aħħar avveniment

Nhar is-Sibt 25 ta’ Lulju, il-MAAA se tkun qed torganizza s-sitt u l-aħħar meeting għall-atleti żgħażagħ fil-kategoriji ta’ taħt it-12 u l-14-il sena, wara xhur ta’ dedikazzjoni u preparamenti.

F’dan l-appuntament, se jkun hemm total ta’ 20 avveniment, bi sprints ta’ bejn 60m u 300m, kif ukoll long jumps u discus u ball throws. Barra minn hekk, se jkun hemm tellieqa addizzjoanli ta’ 1,200 metru steeplechase riservata għal tfajliet u ġuvintur taħt is-16-il sena.

L-avveniment tas-Sibt se jservi ta’ opportunità unika għall-atleti emerġenti f’pajjiżna biex jagħtu spinta finali fit-tħejjija tagħhom għall-Kampjonati Nazzjonali tax-xahar id-dieħel fejn imbagħad se jkunu qed jikkompet għall-midalji u post fuq il-podju. Għall-Under 12s, din se tkun l-aħħar opportunità biex jiksbu ħin jew distanza li permezz tagħha jkunu jistgħu jiġu kkunsidrati għall-Iskola Nazzjonali tal-Isport.

Wara prestazzjonijiet impressjonanti aktar kmieni dan ix-xahar, l-għajnejn kollha se jkunu fuq Elai Borg u Thea Grech, li fl-ewwel ħarġa kompetittiva tagħhom wara l-pandemija kisbu tripletta kull wieħed. It-tnejn, filfatt, rebħu t-tellieqa rispettiva tas-60m u t-300m, li magħhom Borg żied ukoll il-long jump u Grech il-ball throw.

Fost l-Under 14s, Thomas Grech, Liam Falzon, Lyon Falzon u Andrea Incorvaja fost is-subien, u t-twins Shoemake fost il-bniet se jkunu l-ismijiet li mistennija jkunu fost il-protagonisti ta’ dan l-avveniment.

Dan il-meeting se jsir fil-Matthew Micallef St John Track fil-Marsa u jibda fl-4.45 ta’ wara nofsinhar. Il-programm kollu jsegwi hawn taħt. L-avveniment, li għalih hija mistennija attendenza sabiħa fost ġenituri, kowċis, membri tal-komunità tal-atletika u entużjasti sportivi, hu miftuħ għall-pubbliku mingħajr ebda ħlas.

Programm MAAA 25 ta’ Lulju 2020 – Young Athletes Meeting 6

Din l-informazzjoni twasslet mill-Malta Amateur Athletic Assosciation (MAAA).