Minn Malta għal Franza: L-ewwel grupp ta’ immigranti

DOI - Omar Camilleri

L-ewwel grupp ta’ immigranti li waslu Malta abbord l-Aquarius jinsabu fi triqthom għal Franza.

Dan tħabbar dalgħodu fi tweet tal-Prim Ministru Joseph Muscat. Hu sostna li dan il-pass juri l-progress li qed tagħmel l-alleanza Ewropea.

Fi stqarrija mibgħuta mill-Gvern intqal kif id-Deputat Ambaxxatur għal Franza, Vanessa Salas Pouget qalet li dan il-pass għar-rilokazzjoni tal-immigranti jservi bħala eżempju tas-solidarjetà Ewropea. Irrimarkat li dawn l-immigranti se jkollhom ħajja sigura fi Franza.

L-Aquarius daħal Malta fil-15 ta’ Awwissu waranofsinhar. Fuqu kien hemm 141 persuna, 97 minnhom irġiel u 44 nisa. 38 minnhom huma tifel u tifla taħt il-15-il sena, uħud bla ġenituri.

12 minnhom, fosthom 2 nisa tqal u 5 itfal, ittieħdu l-isptar biex jingħataw assistenza medika, filwaqt li l-bqija ttieħdu ċ-Ċentru tal-Marsa.

Franza, Spanja, il-Ġermanja, il-Portugal u l-Lussemburgu kienu qablu li jieħdu l-persuni abbord wara li jinżlu f’Malta. Aktar tard fi stqarrija, l-Uffiċċju tal-Prim Ministru ħabbar li anke l-Italja kienet se tieħu xi immigranti.

L-immigranti huma mill-Bangladesh, mill-Cameroon, mill-Ghana, mill-Kosta tal-Avorju, min-Niġerja, mis-Senegal, minn Togo, mill-Eġittu, mill-Eritrea, mill-Marokk u mis-Somalja.