“Jheddu kandidata għal MEP b’ħajjitha”; ħassret Facebook

Id-Deputat Kap tal-Partit Demokratiku Timothy Alden sostna li l-kandidata għal Membru Parlamentari Ewropew Camilla Appelgren ġiet mhedda b’ħajjitha u b’ħajjet familtha għax esprimiet l-opinjoni tagħha online. Dan wassal biex hi ħassret kemm il-profil tagħha personali, kif ukoll il-paġna ta’ Facebook sabiex tiproteġi lil familtha.

Alden sostna li fost il-messaġġi li ntbagħtu lil Appelgren kien hemm minnhom jgħidulha toqgħod attenta għal ħajjitha, għal ħajjet familtha u li qatt ma għandha tħossha sigura. Intant sostna li kull persuna fil-Partit Demokratiku tinsab wara Appelgren.

To those of you who think it was bullying which made Cami Appelgren shut down her Facebook, think again. She has shown…

Posted by Timothy Alden on Tuesday, May 21, 2019

Intant, il-kandidat tal-istess partit, Martin Cauchi Inglott, qal li jekk wieħed ma jaqbilx ma’ xi ħadd ma għandu l-ebda dritt u raġuni għaliex jhedded lill-persuna, tant li jwassal lil dak li jkun biex iħassar it-traċċi tiegħu online għax jibża’ mir-riperkussjonijiet.

DISAGREEING with someone , no matter what the issue, is NO REASON to personally INSULT, ATTACK, BULLY or THREATEN them…

Posted by Martin Cauchi Inglott on Tuesday, May 21, 2019

Appelgren kienet tagħmel użu frekwenti mill-midja soċjali matul il-kampanja tagħha għall-elezzjonijiet tas-Sibt li ġej.

It-tneħħija tal-profili tagħha ġiet propju wara kontroversja li qamet fuq il-pożizzjoni tal-Partit Demokratiku dwar l-abort. It-Tnejn li għadda, il-Partit Nazzjonalista u l-Partit Demokratiku ffirmaw wiegħda li jressqu emendi fil-Kostituzzjoni tal-pajjiż sabiex l-abort jiġi projbit sal-aħħar tas-sena. Wara dan, Appelgren kitbet fuq il-midja soċjali tagħha li hi ma taqbilx li kull tip ta’ abort jiġi projbit, kumment li qajjem kaos fuq il-midja soċjali.

Newsbook.com.mt ikkuntattja lil Appelgren dwar il-każ madanakollu l-kandidata ma’ kinitx disponibbli biex tagħti kumment dwar il-każ.