Ipprova jixtri lill-Independent biex ommi ma jkollhiex dħul – iben Daphne

REUTERS Yara Nardi

Read in English.

Iben il-ġurnalista assassinata Daphne Caruana Galizia, Matthew Caruana Galizia, sostna li qabel ma qatel lil ommu, Yorgen Fenech ifforma “grupp ta’ rġiel dijaboliċi” sabiex flimkien jixtru l-ġurnal The Malta Independent. Qal li dan kien il-pass tiegħu biex jipprova jaqta’ s-sors ewlieni tad-dħul ta’ ommu.

Din il-post ħariġha fuq Facebook b’reazzjoni għal artiklu ppubblikat mill-ġurnal The Times of Malta li qal li s-suspettat bl-assassinju tal-ġurnalista, Yorgen Fenech, kien ipprova jixtri lill-ġurnal The Malta Independent flimkien mal-lukandier Silvio Debono, bil-prezz mitlub ikun dak ta’ €2 miljun.

Iben il-ġurnalista sostna li meta ra li l-pjan tiegħu ma rnexxhiex, Fenech iddeċieda li jħallas persuni oħrajn sabiex joqtlu lil ommu.

Xi jgħid aktar ir-rapport?

Il-ġurnal Times of Malta tkellem mad-Daphne Caruana Galizia Foundation li sostniet li l-proposta ta’ Fenech setgħet ħalliet lil Caruana Galizia fi stat aktar vulnerabbli għall-attakki.

Din l-allegata proposta ta’ Fenech u Debono kienet seħħet fl-2016, l-istess żmien li fih kien ħareġ l-iskandlu tal-Panama Papers. Liema dokumenti kienu aċċessibbli mill-istess ġurnal.

Times of Malta kompla jgħid kif kelliem għal Debono kien ikkonferma li l-Grupp db kien ġie mitkellem minn Fenech fl-2016 dwar ix-xiri tal-ġurnal. Il-kelliem qal li hu kien fehem li Fenech kien qed jagħmel din it-talba f’isem Tumas Group. Intant, sors minn Tumas Group qal li l-proposta kienet saret wara deċiżjoni li ħa Ray Fenech waħdu. Ray Fenech huwa z-ziju ta’ Yorgen Fenech. Jidher li l-grupp ma ma kienx konxju tagħha u li qatt ma kellu l-ebda interess fis-settur tal-midja.

Intanti, sorsi oħrajn li tkellmu mal-ġurnal qalu li l-eks Chief of Staff tal-Prim Ministru, Keith Schmebri, kien konxju dwar il-proposta li kienet qed issir. Minkejja dan, il-kelliem għall-Grupp db qal li Schembri qatt ma kellu l-ebda involviment fl-ebda laqgħa ma’ Tumas Group. Qal li wara żewġ laqgħat, il-grupp db abbanduna l-pjan għax ħass li ma kienx finanzjarjament vijjabbli.

Intant, il-ġurnal The Malta Independent, f’kumment mat-Times of Malta, qal li l-proposta ta’ Fenech ilha magħrufa għal snin twal. Il-ġurnal qal li Fenech ipprova jaħmel dan l-akkwist fl-2015.