“Investiga lil Schembri” – Il-Kabinett lill-Pulizija

Keith Schembri, Chief of Staff in the office of Malta's Prime Minister Joseph Muscat, waits for official talks between Muscat and his Macedonian counterpart Zoran Zaev to begin at the Auberge de Castille in Valletta, Malta, May 29, 2018. Picture taken May 29, 2018. REUTERS/Darrin Zammit Lupi

Read in English.

It-Times of Malta qed tirrapporta li l-Pulizija ntalbu jarrestaw lil Keith Schembri u jerġgħu jinvestigawh b’rabta mal-assassinju tal-ġurnalista Daphne Caruana Galizia, waqt il-laqgħa tal-kabinett li bdiet il-Ħamis filgħaxija u baqgħet għaddejja sat-3am tal-Ġimgħa. Jidher li dan sar minħabba t-tħassib serju ta’ frame-up fuq Chris Cardona, li l-ġimgħa li għaddiet issospenda lilu nnifsu minn Ministru u Deputat Mexxej tal-Partit Laburista.

Ministri u Segretarji Parlamentari kienu xxukkjati hekk kif semgħu li għaddiet għand l-investigaturi ittra maħsuba li nkitbet mill-eks Chief of Staff tal-Prim Ministru “biex jeħel Cardona”. Mat-Times, Schembri insista li hu m’għandux x’jaqsam mal-ittra. L-allegazzjonijiet jgħidu li l-kumplott biex jeħel Dr Cardona, kien xogħol Schembri u Yorgen Fenech. Fenech tressaq quddiem il-Qorti b’arrest ilbieraħ filgħaxija.

L-istess sit jikkwota membru tal-Kabinett jgħid li kienet l-agħar esperjenza ta’ ħajtu meta qara l-ittra ta’ erba’ paġni. Allegatament l-ittra ntbagħtet minn Schembri għal Fenech permezz tat-tabib Adrian Vella, li huwa wkoll it-tabib ta’ Schembri u Fenech.

“Ma jimpurtax twaħħal f’Cardona”

Fil-jiem li għaddew, sorsi infurmati qalu ma’ Newsbook.com.mt li f’ċertu ħin fil-kuntatti bejn l-eks Chief of Staff tal-Prim Ministru u n-negozjant Yorgen Fenech, Schembri qallu li “ma jimpurtax li ssemmi lil Cardona basta ma ssemmix lili”. Schembri ċaħad bil-qawwa kollha li pprova jagħmel frame up.

Kien Newsbook.com.mt li żvela għall-ewwel darba l-komunikazzjoni bejn Fenech u Schembri. Fenech kien qal li Schembri bagħatlu messaġġi jgħidu “tikxifnix u ngħinek”. Iżda Fenech iddeċieda li jikxef dik li hu sejjaħ il-korruzzjoni dwar l-Electrogas u saħansitra l-windfarms li l-Enemalta bniet fil-Montenegro. Fenech tkellem ukoll dwar l-assassinju tal-ġurnalista Daphne Caruana Galizia.

Aktar dettalji dalwaqt.