Imutu iktar anzjani bil-Covid-19

Is-Supretendent tas-Saħħa Pubblika Prof. Charmaine Gauci ħabbret erba’ mwiet oħra bil-Covid-19. Dan ifisser li mill-bidu tal-pandemija f’Malta f’Marzu li għadda mietu 132 persuna.

Fil-konferenza tal-aħbarijiet ta’ kull nhar ta’ Ġimgħa, Prof. Gauci tat id-dettalji tal-anzjani li mietu fl-aħħar 24 siegħa. Dawn huma:

  • Anzjana ta’ 85 sena. Ikkonfermata pożittiva fit-13 ta’ Novembru. Mietet ilbieraħ filgħaxija fl-Isptar Mater Dei.
  • Anzjan ta’ 73 sena. Ikkonfermat pożittiv fl-20 ta’ Novembru. Miet illum fl-Isptar Mater Dei.
  • Anzjan ta’ 72 sena. Ikkonfermat pożittiv fit-22 ta’ Novembru. Miet illum fl-Isptar Mater Dei.
  • Anzjan ta’ 81 sena. Ikkonfermat pożittiv fis-26 ta’ Novembru (ilbieraħ). Miet iktar kmieni llum.

Prof. Gauci semmiet kif fl-aħħar ġimgħa ġiet irreġistrata 24 mewt li kienu mqassmin hekk:

  • 2 kellhom bejn 60 u 69 sena
  • 10 kellhom bejn 70 u 79 sena
  • 10 kellhom bejn 80 u 89 sena
  • 2 kellhom minn 90 sena ‘l fuq

Xi spikka aktar mill-konferenza ta’ Prof. Gauci?

  • Li taħslu idejkom bl-ilma u s-sapun aħjar mis-sanitiser
  • Jekk inżajt il-maskra, aħsel idejk jew uża s-sanitiser qabel terġa’ tilbisha
  • Ħassru l-ikliet tal-Milied. Jien se nqatta’ l-Milied ma’ żewġi u ibni, għax ngħixu f’dar waħda
  • Il-bars u l-każini se jibqgħu magħluqa matul Diċembru
  • Rapid testing issa disponibbli wkoll f’Għawdex
  • L-età medja ta’ każi pożittivi hija ta’ 44. L-akbar grupp hu dak ta’ bejn il-25 u l-44 sena.
  • F’Għawdex hemm 75 każ attiv ta’ coronavirus.
  • Malta bi strateġija preparata għall-vaċċin tal-Covid-19: fejn se jinżammu, database għal dawk li jeħduha, prijorità min jeħodha l-ewwel