Miniso jiftaħ f’Malta

Read in English.

Il-Prim Ministru Robert Abela, akkumpanjat mill-Ministru għall-Ekonomija, Investiment u Negozji Żgħar Silvio Schembri, inawguraw uffiċjalment investiment tal-Grupp JB f’linja ta’ ħwienet internazzjonali Miniso. Il-Grupp JB iħaddem madwar 250 ruħ u fiż-żmien li ġej huwa maħsub li se jimpjega aktar ħaddiema sabiex jaħdmu fl-operazzjonijiet kummerċjali kollha tal-grupp.

Id-ditta internazzjonali Miniso tispeċjalizza fis-settur tal-wholesale u retail modern li hija tal-ewwel tax-xorta tagħha f’pajjiżna. Din il-linja famuża ta’ ħwienet għandha madwar 3,900 stabbiliment imferrxin mad-dinja kollha u l-pass li jmiss kien il-ftuħ ta’ stabbiliment f’pajjiżna b’għażla mill-isbaħ, unika u moderna għall-konsumatur Malti. Il-Prim Ministru awgura kull suċċess lill-Grupp JB u lill-ħaddiema kollha li se jkunu qed joperaw minn dan il-ħanut.

Huwa wera s-sodisfazzjon tiegħu li dan il-grupp mhux biss qiegħed ikompli jkabbar u jimraħ fin-negozju tiegħu, iżda se jkompli jżid aktar ħaddiema. Il-Prim Ministru Abela qal li huwa kruċjali li f’dan is-settur tar-retail dejjem ikun hemm ħwienet li joffru prodotti ta’ kwalità.

Innota li s-sena li għaddiet il-konsum f’Malta laħaq iċ-ċifra rekord ta’ €8 biljun u żied jgħid li mill-2013 ‘l hawn kull jumejn kellna żieda ta’ tliet kumpaniji fil-qasam tal-wholesale u retail, jiġifieri kuljum inkluż il-Ħdud u festi fetaħ aktar minn ħanut wieħed bħala medja. Il-Prim Ministru temm jgħid li “l-ftuħ tal-lum huwa turija ta’ fiduċja fil-pajjiż. M’għandix dubju li l-pajjiż se jkun qed irodd din il-fiduċja f’aktar għajnuna u konsum mill-konsumaturi.” 

Id-Direttur Maniġerjali tal-Grupp JB Chris Sant qal li l-grupp qiegħed jinvesti madwar €5 miljun fi proġetti li hemm ippjanati għaż-żmien li ġej; partikolarment bil-ftuħ ta’ iżjed stabbilimenti madwar il-pajjiż kollu. Qal li dan l-investiment se jsarraf b’mod dirett fir-riżors uman billi jiżdiedu l-impjiegi hekk kif fl-aħħar erba’ snin, il-kumpanija żiedet it-total tal-impjegati tagħha b’70 ruħ.  

Huwa ħabbar ukoll li fil-futur qrib, JB Group se żżid 20 persuna oħra b’effett immedjat. Is-Sur Sant qal li jinsab fiduċjuż li bħalma “gawdejna s-suċċess fil-passat, se nkomplu ngawduh fil-futur, kemm f’investimenti preżenti, kif ukoll f’dawk futuri. Nixtieq nirringrazzja lill-klijienti u ħaddiema tagħna li dejjem urew appoġġ u leatlà lejna bħala familja fin-negozju, u li mxew magħna ma’ kull pass li ħadna”.

Din l-informazzjoni twasslet mid-Dipartiment tal-Informazzjoni.