Il-post ta’ Evelyn Vella Brincat fil-Kunsill jibqa’ battal

Il-Kummissjoni Elettorali għarrfet li ħadd ma ġie ppreżentat għall-elezzjoni każwali ta’ kunsillier flok Evelyn Vella Brincat għall-Kunsill Lokali ta’ Pembroke.

Illum ħabbru fi stqarrija li ż-żmien għan-nominazzjonijiet għalqu, u għalhekk ħadd m’hu se jsir kunsillier flok Evelyn. Evelyn Vella Brincat kienet kunsilliera f’isem il-Partit Nazzjonalista, u kienet ukoll minority leader fi ħdan l-istess kunsill.

Evelyn hija mfakkra għall-imħabba tagħha lejn l-annimali, bl-għadd ta’ programmi li ipproduċiet dwarhom. Hi mfakkra wkoll għall-irwol politiku attiv tagħha, kif ukoll għall-fatt li hi membru fundatur tal-Metastatic Breast Cancer Malta Support Group li permezz tiegħu għenet għadd ta’ persuni bil-marda tal-kanċer.

Hi mietet tard il-Ġimgħa filgħaxija meta tilfet il-battalja tal-kanċer li ilha tiġġieled snin.