Filmat: Il-partitarji favur Delia jinġabru quddiem id-Dar Ċentrali

Għadd ta’ partitarji Nazzjonalisti li jappoġġjaw lill-Kap tal-Partit Nazzjonalista Adrian Delia nġabru quddiem id-Dar Ċentrali f’Tal-Pietà llejla biex juruh l-appoġġ tagħhom.

Wara li din il-ġimgħa, 19-il membru parlamentari ressaq vot ta’ sfiduċja f’Delia bħala Kap tal-Oppożizzjoni fil-konfront tal-11-il persuna li vvutat favurih, Delia qed jaffaċċja ċ-ċans li jitneħħa mill-President George Vella mill-kariga tiegħu bħala Kap tal-Oppożizzjoni.

Il-mozzjoni ta’ sfiduċja f’Delia tressqet minn Chris Said u ġiet sekondata minn Therese Comodini Cachia. Wara dan ir-riżultat, Delia insista li huwa beħsiebu jibqa’ Kap tal-Oppożizzjoni u tal-Partit Nazzjonalista, għaliex it-tesserati eleġġew lilu.

Jipproponu lil Therese Comodini Cachia bħala Kap tal-Oppożizzjoni

Madankollu, illum, il-Membri Parlamentari Chris Said u Claudette Buttigieg marru għand il-President George Vella sabiex dan ineħħi lil Adrian Delia minn Kap tal-Oppożizzjoni, u minfloku jaħtar lil Therese Comodini Cachia.

Wara din il-laqgħa, Delia stess attenda laqgħa ta’ madwar siegħa mal-President. Kien hu stess li talab li ssir din il-laqgħa. Wara l-laqgħa ma’ Delia, għadd ta’ Membri Parlamentari marru l-Palazz ta’ Sant’Anton biex jitkellmu mal-President fuq is-sitwazzjoni.

Filmat: MPs tal-PN jiltaqgħu mal-President wara li ltaqa’ ma’ Adrian Delia

Quddiem id-Dar Ċentrali hemm madwar 50 persuna biex juru l-appoġġ tagħhom lil Delia.

Filmat: Monique Agius