Il-coronavirus ma waqqafx lill-Għawdxin milli jagħtu d-demm

L-imxija tal-coronavirus li kienet fl-eqqel tagħha bejn Marzu u Mejju ta’ din is-sena, meta l-ħruġ kien limitat minħabba għadd ta’ restrizzjonijiet implimentati, jidher li ma waqqfitx lill-Għawdxin milli jagħtu d-demm, peress li sa tmiem Mejju, kienu marru jagħtu d-demm madwar 600 persuna, ftit inqas minn nofs in-nies li taw id-demm is-sena li għaddiet.

Fi statistika ppubblikata fil-Parlament mill-Ministru għas-Saħħa Chris Fearne, meta mistoqsi fuq dan mid-Deputat Nazzjonalista Għawdxi Chris Said, jidher li sa tmiem Mejju ta’ din is-sena, marru 617-il persuna jagħtu d-demm, b’total ta’ 501 donazzjoni.

Is-sena li għaddiet marru 1,604 persuni jagħtu d-demm b’total ta’ 1,326 donazzjoni. Din kienet l-inqas sena li fiha ngħata demm mill-2011 sal-lum. Min-naħa l-oħra, l-aktar sena li fiha saru donazzjonijiet tad-demm mill-Għawdxin kienet l-2016, meta rrikorrew 2,187 donatur u saru 1,798 donazzjoni.

Iktar bżonn ta’ demm għal operazzjonijiet li qed jiġu skedati mill-ġdid

L-istatistika

L-MP Said staqsa wkoll hemmx il-ħsieb li l-Bank tad-Demm f’Għawdex jibda jiftaħ kuljum minflok darba kull 15-il ġurnata, sabiex dan ikun aktar aċċessibbli. Id-Deputat Prim Ministru u Ministru għas-Saħħa Fearne wieġeb li l-NBTS minn żmien għal żmien jagħmlu analiżi f’Għawdex, u jekk ikun tinstab il-ħtieġa, jiġi kkunsidrat li l-Bank tad-Demm jinfetaħ aktar ta’ spiss.

Filmat: “Min jagħti d-demm jagħti l-ħajja” – l-Arċisqof Scicluna