Ħlas bil-quddiem għall-ħaddiema ta’ Skola Sajf

Il-Fondazzjoni għall-Servizzi Edukattivi ħabbret li se jinħareġ perċentaġġ mill-paga bil-quddiem lil ħaddiema ta’ Skola Sajf li għadhom ma ħadux paga.

Aktar kmieni dan ix-xahar l-Unjin tal-Edukaturi Professjonali (UPE) irreġistrat tilwima industrijali mal-Fondazzjoni minħabba l-ħlasijiet lill-edukaturi tal-Iskola Sajf. It-tilwima seħħet minħabba l-fatt li l-ewwel pagament li l-edukaturi mistennija jirċievu se jseħħ fis-7 ta’ Settembru u t-tieni wieħed se jseħħ fl-10 ta’ Ottubru. Skont l-Unjin dewmien bħal dan huwa ksur tal-Att għax-Xogħol u r-Relazzjonijiet Industrijali li jistipula li l-ħaddiema għandhom jirċievu pagamenti regolari u l-arretrati ma għandhomx jeċċedu l-erba’ ġimgħat.

Il-Fondazzjoni rrimarkat li se tkun qed tintroduċi sistema operattiva ġdida biex il-pagamenti tal-ħaddiema fuq bażi part-time jkunu regolati. Skont il-Fondazzjoni, din is-sena applikaw mat-12.000 tifel u tifla, żieda ta’ 700 mis-sena li għaddiet u dawn tqassmu f’59 ċentru madwar Malta u Għawdex.