Il-Pulizija “se tieħu l-passi neċessarji” fuq il-filmat ta’ Cutajar dwar il-Kummissarju tal-Annimali

Aġġornat 09:29 AM

Cassola jagħmel rapport mal-Pulizija

Read in English.

Il-Pulizija tad-Distrett fejn joqgħod Anton Cutajar, sid l-Arka ta’ Noe fis-Siġġiewi, li nbniet illegalment u ġiet sanzjonata mill-Awtorità tal-Ippjanar, se tieħu l-passi neċessarji fil-konfront tiegħu wara filmat li xerred ilbieraħ li fih qal li lest ineħħi lill-Kummissarju għall-Ħarsien tal-Annimali Alison Bezzina mill-pożizzjoni tagħha jekk tieħu azzjoni kontra ż-zoo tiegħu.

Il-Kap tal-Oppożizzjoni Bernard Grech appella lill-Prim Ministru Robert Abela biex jikkundanna l-aġir ta’ Anton Cutajar u jiddiżassoċja ruħu minnu.

Nuri solidarjetà mal-Kummissarju tal-Annimali Alison Bezzina.Nistenna li l-Prim Ministru Robert Abela immedjatament…

Posted by Bernard Grech on Tuesday, December 8, 2020

Il-kandidat indipendenti Arnold Cassola għamel rapport mal-Pulizija tat-Taqsima tas-Cybercrime fuq it-theddid u l-ibbuljar ta’ Alison Bezzina. Dalgħodu ħabbar li l-Pulizija infurmatu li saret preservazzjoni tal-filmat, u l-Pulizija tad-Distrett fejn joqgħod Cutajar ġiet avżata sabiex tieħu l-passi neċċessarji.

L-ADPD ukoll ikkundanna dan l-aġir. Fi stqarrija, Carmel Cacopardo qal li, “Anton Cutajar iħossu intitolat jhedded għax jgħid li huwa partitarju tal-Partit Laburista. Dawn huma t-tip ta’ nies li mdorrijin isibu politiċi jċedulhom u jħalluhom jagħmlu li jridu: u ġabu lil pajjiżna fl-istat miskin li qegħdin fih. Lil Alison Bezzina ħalluha taħdem!”

Min-naħa tagħha, Bezzina qalet li s-silenzju tagħha m’għandux jitqies bħala nuqqas ta’ azzjoni. Stqarret li l-ħarsien tal-annimali dejjem se jiġi l-ewwel.

Thank you all for your support. Don’t misinterpret my silence for inaction or withdrawal. Animal Welfare will always come first.

Posted by Alison Bezzina on Tuesday, December 8, 2020

F’filmat imxandar b’mod dirett ilbieraħ, Anton Cutajar wissa lill-Kummissarju Bezzina li jekk tibqa’ sejra kif inhi sejra, se jibgħat ittri lil min hu meħtieġ u jneħħiha mill-kariga tagħha.

Cutajar allega li l-kummenti tal-Kummissarju huma parti minn aġenda kontrih. Saħaq li aktar kemm jagħmlulu, hu aktar jissaħħaħ.

Fix-xandira tiegħu li damet nofs siegħa, huwa rreaġixxa għall-kummenti ta’ Bezzina meta din qalet li ż-zoos mhumiex “ideali,” u li l-pożizzjoni tagħha hi waħda: li l-annimali mhux posthom fil-gaġeġ.

Semmiet kif l-għadd ta’ zoos f’Malta żdiedu u li s-sitwazzjoni tirrikjedi li ż-zoos ikunu regolati kif suppost sabiex issir inqas ħsara lill-annimali.

Il-Kummissarju Bezzina għamlet il-kummenti tagħha wara li t-Tnejn, ingħalqet il-konsultazzjoni pubblika fuq ir-regoli l-ġodda proposti għaż-zoos. Il-Gvern mar lura mill-pjanijiet tiegħu li jipprojbixxi l-ippettjar tal-annimali.

Wara li ħassar il-flmat, Cutajar kiteb fuq Facebook li hu ċittadin “komuni u privat” li m’għandux uffiċċju pubbliku. Żied jgħid li f’pajjiż demokratiku għandu dritt għall-opinjoni tiegħu, u li bl-ebda mod m’aġixxa b’mod vjolenti jew m’hedded lil ħaddieħor.

Qal ukoll li m’użax lingwa mhux xierqa u lanqas ma prova jbeżża’ lil xi ħadd. Argumenta li għandu dritt jikkritika lil “din il-persuna” li ġiet appuntata bħala Kummissarju għall-Ħarsien tal-Annimali “mingħajr ebda kwalifiki.”

“Iva possibbli m’hawn ħadd f’Malta kwalifikat li jista’ jokkupa din il-kariga?” staqsa Cutajar qabel ma żied jgħid li hu stess ġie mhedded.