“F’Mejju se jkun diffiċli li mmorru tajjeb” – Dr Busuttil

Il-Kap Nazzjonalista Simon Busuttil talab lill-pubbliku sabiex wara sena ta’ Gvern ġdid jevalwa jekk il-politika ta’ Dr Joseph Muscat hix tassew politika ta’ futur jew jekk hix politika aktar antika minn tal-passat.
F’attività politika fil-Mellieħa, Dr Simon Busuttil qal li ma ntrefgħatx ir-responsabilità politika mill-Ministru Chris Cardona li nstab li ndaħal f’tenders.
Dr Busuttil qal li ħadd m’għadu jemmen li “Malta Tagħna Lkoll” għax il-mara tal-Ministru Konrad Mizzi qed tieħu €13,000 f’xahar u dan meta “għadna ma smajna bl-ebda investiment miċ-Ċina.”
Il-Kap tal-Oppożizzjoni qal li f’din l-ewwel sena, il-korruzzjoni saret “aċċettata bil-barka tal-Gvern li huwa ħażin.”
Dr Simon Busuttil qal li l-Gvern Nazzjonalista ħadem ħafna għar-reputazzjoni ta’ Malta, iżda issa fl-ewwel sena tiegħu, Dr Joseph Muscat rema’ din ir-reputazzjoni “bil-bejgħ tal-passaporti” u anke biegħed lil min ried jinvesti fis-sistema tat-trasport f’Malta għax “il-Gvern jindaħal.”
Dr Busuttil staqsa għalfejn il-Prim Ministru jħossu aktar komdu jitħabbeb ma’ pajjiżi ta’ dittatorjat milli ma’ demokraziji, filwaqt li qal li dan jibgħat messaġġ ħażin.
Dwar il-qgħad, il-Kap Nazzjonalista uża l-istess kliem ta’ Dr Muscat u qal li “jekk għandek problema u ma tirrikonoxxihix, m’għamiltx l-ewwel pass biex issolviha.”
Dr Busuttil staqsa li jekk il-Prim Ministru għandu l-aqwa kabinett kif diġa’ se jagħmel reshuffle.
Il-Kap Nazzjonalista qal li l-Gvern għandu mandat li jibni powerstation ġdida u jraħħas il-kontijiet iżda la t-tanker ma kienx fil-programm elettorali, il-Partit Nazzjonalista mhux se jaċċettah u se joġġezzjona bil-qawwa kollha.
Hu qal li l-Gvern hu immatur, mhux responsabbli u mhux qed jagħti każ lin-nies billi jdaħħal proposta żbaljata ta’ riskju.
Dr Busuttil appella lill-MEPA sabiex ma tiddeċidix għax hemm “maġġoranza mill-Partit Laburista” imma fl-interess tal-poplu Malti u Għawdxi kollu.
Il-Kap Nazzjonalista rrefera għar-riżultat tal-elezzjoni ġenerali tas-sena li għaddiet u b'referenza għall-elezzjoni tal-Ewro-Parlamentari qal li “f’Mejju se jkun diffiċli li se mmorru tajjeb.” Dr Busuttil appella biex il-Partit Nazzjonalista jibqa’ jaħdem ħalli jirbaħ il-fiduċja tan-nies.