Filmat: Justyne Caruana reġgħet Ministru għax ma kinitx involuta fl-allegazzjonijiet dwar żewġha – Il-PM

Read in English.

Il-Prim Ministru Robert Abela qal li daħħal lil Justyne Caruana lura fil-Kabinett għax huwa “ċarissimu” li hi ma kellha l-ebda involviment f’dak li hu allegat dwar żewġha Silvio Valletta.

Justyne Caruana kienet Ministru għal Għawdex iżda rriżenjat ftit jiem wara li ħadet il-ġurament tal-ħatra f’Jannar li għadda meta ġie żvelat li żewġha, eks Deputat Kummissarju tal-Pulizija, siefer ma’ Yorgen Fenech wara li dan ġie identifikat bħala persuna ta’ interess fl-assassinju ta’ Daphne Caruana Galizia.

Yorgen Fenech ilu sena taħt arrest preventiv, akkużat b’kompliċità fl-assassinju tal-ġurnalista Daphne Caruana Galizia.

Fuq ir-riżenja ta’ Justyne Caruana
Justyne Caruana tirriżenja minn Ministru

Bir-reshuffle tal-Kabinett tas-Sibt li għadda, Caruana reġgħet saret Ministru, din id-darba Ministru tal-Edukazzjoni. Mistoqsi mill-ġurnalisti għaliex reġa’ taha ministeru, il-Prim Ministru qal li hija mara kompetenti u li jixirqilha.

Apparti hekk, huwa saħaq li jekk żewġha kellu xi involviment f’dak li hu allegat, hija ma kinitx involuta. Barra minn hekk, wara r-riżenja tagħha, il-koppja sseparat.

Il-Prim Ministru temm jgħid li d-deċiżjoni tiegħu kienet ibbażata fuq x’għamlet u x’m’għamlitx Justyne Caruana.

Silvio Valletta qed jiġi investigat mill-Pulizija.