Filmat: Is-sitwazzjoni tal-Covid-19 għadha stabbli u taħt kontroll – Il-PM

Read in English.

Il-Prim Ministru Robert Abela qal li s-sitwazzjoni tal-Covid-19 għadha stabbli u taħt kontroll.

Dan qalu lill-ġurnalisti wara konferenza tal-aħbarijiet dalgħodu.

Il-Prim Ministru għal darb’oħra saħaq li l-pandemija m’għandhiex tiġi politiċizzata, u qal li għadu jemmen li s-sitwazzjoni f’Malta hija taħt kontroll, minkejja l-imwiet li kien hemm bil-virus, li hu qal li jiddispjaċih ferm dwarhom. Iġġustifika, iżda, li l-ebda pajjiż ma rnexxielu jipprevjeni li jmutu n-nies b’dan il-virus.

Sostna li Malta qed tisboq lil pajjiżi oħrajn f’din il-ġlieda, kemm mil-lat mediku fir-rata tal-imxija, kif ukoll fis-sitwazzjoni ekonomika. B’mod ħolistiku, qal il-Prim Ministru, Malta mxiet tajjeb ħafna.

Dalgħodu wkoll, il-PM ħabbar li b’konsultazzjoni mal-professjonisti mediċi, il-Gvern iddeċieda li ma jiftaħx il-bars u l-każini fl-1 ta’ Diċembru kif kien ippjanat, imma li dawn jinżammu magħluqin fil-ġimgħat li ġejjin.

Bħalissa Malta għandha 2,069 każ attiv tal-coronavirus, u mietu b’kollox 125 peruna.

Filmat: Miguela Xuereb