Filmat: Agħmel “Seba’ Waqfiet ma’ Ġesù” f’Ħamis ix-Xirka

Aġġornat 11:37 AM

Read in English.

L-Arċisqof Charles Scicluna se jmexxi mument ta’ talb u riflessjoni mill-Katidral ta’ San Pawl, l-Imdina, bit-tema ‘Seba’ Waqfiet ma’ Ġesù’ f’Ħamis ix-Xirka.

Dan se jixxandar fuq l-istazzjonijiet ewlenin tat-televixin u fuq mezzi ta’ komunikazzjoni soċjali oħra, għada, 9 ta’ April, Ħamis ix-Xirka, fit-8:30pm.

Fi stqarrija, l-Arċidjoċesi spjegat li din is-sena, flok is-Seba’ Visti fejn is-soltu isir pellegrinaġġ f’seba’ knejjes, l-Insara qed jiġu mistiedna biex bħad-dixxipli fl-aħħar lejl ma’ Ġesù, jishru miegħu. Dan issa se jkun qed isir permezz ta’ riżorsi diġitali ta’ talb li ħejjiet l-Arċidjoċesi ta’ Malta għal dawn il-jiem tal-Ġimgħa Mqaddsa. It-test ta’ dan il-mument ta’ talb, kemm bil-Malti u wkoll bl-Ingliż, hu disponibbli online fuq soter.knisja.mt.

F’dan il-mument diffiċli, Mons. Arċisqof se jmexxi talb u riflessjonijiet b’qari mill-Evanġelju skont San Ġwann mir-rakkont tal-Aħħar Ċena. Bħad-dixxipli fiċ-ċenaklu mal-Imgħallem, mid-djar tagħna se ‘niltaqgħu’ fil-Katidral għal mument ta’ talb b’ispirazzjoni mill-arti ta’ dan it-tempju.

Se jkunu qed janimaw dan it-talb Paul u Denise Mintoff, Jacob Portelli fuq iċ-ċetra u l-arpa, u Giulia Privitelli, storika tal-arti minn Pietre Vive, li se taqsam riflessjonijiet dwar xogħlijiet mill-patrimonju artistiku tal-Katidral marbuta mas-siltijiet mill-Iskrittura li se jinqraw.

Din il-produzzjoni b’kollaborazzjoni bejn il-PBS u l-Arċidjoċesi ta’ Malta se tixxandar fuq TVM2, NET, ONE, Xejk, fuq 103, u wkoll online fuq Knisja.mt, Newsbook.com.mt, Timesofmalta.com u Illum.com.mt.