Aġġornata: Filmat: Ir-riżervi tal-FKNK ivvandalizzati fil-Miżieb

Il-ħaddiema tal-Protezzjoni Ċivili dalgħodu kienu għadhom qegħdin jissieltu man-nirien li ħakmu l-Miżieb ilbieraħ, u qalu lil Newsbook.com.mt li minkejja li m’hemm xejn kbir, x’aktarx għandhom jumejn ġejjin u sejrin biex jitfu n-nirien peress li dan faċilment jerġa’ jaqbad. Il-Federazzjoni Kaċċaturi Nassaba Konservazzjonisti qalet li hemm suspett li n-nar ma bediex waħdu, u l-Ministeru għall-Ambjent ma nnegax dan il-fatt. Waranofsinhar, l-FKNK ħabbret li r-riżervi tagħha fil-post kienu ġew vandalizzati.

L-FKNK qalet li hija kkuntattjat lill-pulizija biex jinvestigaw dan il-vandaliżmu li kien magħmul minn skart imferrex fuq il-post. Hija qalet li l-ebda ħsara, vandaliżmu, vendikazzjoni jew provokazzjoni mhi se twaqqaf ix-xogħol jew taqta’ qalb il-membri tagħha fir-Riżervi tal-Miżieb u tal-Aħrax, filwaqt li baqgħet tinsisti li r-Riżervi jkollhom s-sorveljanza uffiċjali neċessarja u l-infurzar adekwat kif xieraq.

Ritratti: Nar fil-Miżieb

Dan in-nar jidher li qabad kawża tas-sħana li ħakmet lill-Gżejjer Maltin f’dawn l-aħħar jiem. L-awtoritajiet qed jappellaw lill-Kunsilli Lokali sabiex jieħdu ħsieb li jitneħħa l-ħaxix ħażin minn akkwati pubbliċi jew miftuħa filwaqt li l-bdiewa kemm jista’ jkun għandhom iwarrbu l-ħaxix qabel tikkarga s-sħana.

Fi stqarrija, il-Federazzjoni Kaċċaturi Nassaba Konservazzjonisti (FKNK) qalet li n-nar ħakem madwar 50 tomna mir-Riżerva tal-Federazzjoni. Il-Federazzjoni qalet li membri mis-sottokumitat tagħha qattgħu diversi sigħat, flimkien ma’ ħafna pumpiera tal-Protezzjoni Ċivili u l-voluntiera tas-St John Rescue Corps issieltu mhux ftit sakemm ikkontrollaw in-nirien, u kien grazzi għal dawn li l-ħsara ma komplitx tinxtered.
“Suspett li n-nar ma bediex waħdu” – FKNK
Qalu wkoll li hemm suspett li n-nar seta’ ma bediex waħdu, u għalhekk sar rapport uffiċjali mal-pulizija.
Min-naħa tagħha, l-NGO Birdlife Malta wkoll ħarġet stqarrija lbieraħ li fiha esprimiet niket għal dak li qed jiġri fil-Miżieb, u qalet li diġà kitbet lill-Ministru għall-Ambjent José Herrera u lil Ambjent Malta biex toffri l-għajnuna tagħha fil-proċess ta’ riġenerazzjoni tal-post.

 

Sfortunatament ritratt mehud issa, qed jerga jaqbad

Posted by Mizieb Hunting Reserve on Saturday, June 22, 2019

“Irid isir pjan ta’ riġenerazzjoni” – Il-Ministeru

Il-Ministru għall-Ambjent talab lill-Awtorità tal-Ambjent u r-Riżorsi (ERA) u lil Ambjent Malta sabiex issa li n-nirien ġew kontrollati u mitfija, fil-biċċa l-kbira, b’mod immedjat jibda eżerċizzju ta’ analiżi tal-ħsara li saret min-nirien li ħakmu ż-żona. Dan għandu jwassal ukoll sabiex jiġi identifikat pjan biex iż-żona tiġi riġenerata bl-aħjar mod possibbli u b’interventi li jħallu l-inqas impatt ekoloġiku.

Il-Ministru jsostni li filwaqt li f’dan l-istadju għadu mhux magħruf x’wassal għall-kawża tan-nirien li ħakmu, ikun għaqli li bħala punt ġenerali l-pubbliku joqgħod attent biex ma jarmix skart f’dawn it-tip ta’ postijiet, jevita għalkollox li jitqabbdu xi nirien, kif ukoll ikun aktar kawt f’dak kollu li jkun qiegħed jagħmel biex jiġu evitati inċidenti bħal dawn.