Fenech ma jkomplix joġġezzjona għal Arnaud; iwaqqa’ l-każ

REUTERS/Yara Nardi/File Photo

Is-sid tal-kumpanija 17 Black, Yorgen Fenech waqqa’ l-każ li fetaħ sabiex jitneħħa l-Ispettur Keith Arnaud mill-investigazzjoni tal-ġurnalista assassinata Daphne Caruana Galizia. Fenech, li issa qed jiġi akkużat li kien kompliċi fl-assassinju, fil-Qorti hu wieġeb mhux ħati.

L-avukati ta’ Fenech kienu argumentaw li l-Ispettur Arnaud kien viċin ħafna tal-eks Chief of Staff tal-Prim Ministru Keith Schembri. Fenech qed jgħid li Schembri wkoll kellu x’jaqsam mal-assassinju tal-ġurnalista.

Il-Korp tal-Pulizija kien qal li m’hemm l-ebda bażi biex l-Ispettur Keith Arnaud jitneħħa mill-investigazzjoni. Fi stqarrija, il-Pulizija qalet ukoll li mhux se jitneħħa minħabba r-riżultati li nkisbu s’issa u li ilu mill-bidu jmexxi din l-investigazzjoni, bl-assistenza tal-Europol, li għadhom sal-ġurnata tal-lum involuti fl-investigazzjoni.

Fl-20 ta’ Novembru, Fenech spiċċa arrestat wara li l-jott tiegħu ġie interċettat mill-Forzi Armati ta’ Malta hu u ħiereġ mill-marina ta’ Pembroke. Hu nħeles fuq police bail għal numru ta’ drabi qabel ma ġie uffiċjalment akkużat bl-assassinju tal-ġurnalista. Hu tressaq il-Qorti b’rabta mal-każ is-Sibt li għadda.

Dan il-każ kellu jkompli jinstema’ llum, iżda l-Qorti infurmat lill-ġurnalisti li l-każ kien twaqqa’.