Ara kif tista’ tagħmel differenza b’dan il-kalendarju

Il-Fondazzjoni LifeNetwork Malta b’appell għal kalendarju tal-avvent

Ritratt: Pixabay

Diċembru huwa sinonimu mal-kalendarju tal-avvent, kalendarju li ta’ kuljum jagħtik rigal. X’taħseb li kieku din is-sena minflok tirċievi, tkun inti li tagħti rigal ċkejken kuljum? LifeNetwork Malta qiegħda toffrilek din l-opportunità.

Din l-organizzazzjoni volontarja, li tiddependi ħafna fuq il-ġenerożità tal-poplu Malti, tgħin lil tfajliet u nisa li jsibu ruħhom f’diffikultà waqt it-tqala billi toffri pariri professjonali u sapport.

Din is-sena minħabba l-pandemija, LifeNetwork Malta għandha bżonn iżjed għajnuna minn qatt qabel. Inti, flimkien mal-membri tal-familja tiegħek jew anke sħabek tista’ tagħmel differenza billi kuljum tpoġġi ġo kaxxa oġġett mil-lista ta’ hawn taħt. Wara l-25 jum, il-kaxxa tkun imtliet b’25 prodott u tistgħu tmorru biha fl-uffiċċju ta’ LifeNetwork Malta l-Belt Valletta jew inkella d-Dar Tgħanniqa t’Omm il-Mosta.

Bħala ringrazzjament, għal kull kaxxa li inti tagħti bħala donazzjoni, tingħata kalendarju tal-LifeNetwork Malta għas-sena 2021. Għal aktar informazzjoni tista’ ċċempel fuq 77115433.

  • L-ewwel jum: ħalib tat-trabi
  • It-tieni jum: ħrieqi
  • It-tielet jum: barrier cream
  • Ir-raba’ jum: libsa ta’ taħt tat-trabi
  • Il-ħames jum: xugaman tat-trabi
  • Is-sitt jum: qlejba
  • Is-seba’ jum: zokkor
  • It-tmien jum: flixkun għat-trabi (baby bottle)
  • Id-disa’ jum: soother
  • L-għaxar jum: cotton buds
  • Il-11-il jum: pakkett ross
  • It-12-il jum: baby wipes
  • It-13-il jum: bott piżelli
  • L-14-il jum: bott tadam
  • Il-15-il jum: baby lotion
  • Is-16-il jum: sapun għax-xagħar tat-trabi (baby shampoo)
  • Is-17-il jum: te
  • It-18-il jum: bott corned beef
  • Id-19-il jum: sapun tal-ħasil għall-ħwejjeġ tat-trabi
  • L-20 jum: pakkett penne
  • Il-21 jum: dqiq
  • It-22 jum: stoċċ kunserva
  • It-23 jum: ċekċieka (baby teether)
  • L-24 jum: pakkett spagetti
  • Il-25 jum: kutra tat-trabi