Aktar minn 150,000 familja f’Malta huma sidien ta’ djarhom

Photo by PhotoMIX Company from Pexels

Read in English.

Aktar minn 150,000 familja f’Malta huma sidien ta’ djarhom. Dan ħareġ fi stqarrija mill-Ministeru għall-Familja b’reazzjoni għall-istatistika maħruġa mill-Uffiċċju Nazzjonali tal-Istatistika. L-istatistika tħares lejn l-għadd ta’ familji sidien ta’ djarhom fl-2019 u tgħid li dan laħħaq 151,260.

Il-Ministeru qal li dan ifisser li tmienja minn kull 10 djar f’Malta u Għawdex huma propjetà ta’ dawk li jgħixu fihom. Intant, il-kumplament huma mikrija, jew min jgħix fihom ma jħallasx kera. L-għadd ta’ postijiet mikrija fl-2019 kien ta’ ftit aktar minn 45,000.

L-Uffiċċju tal-Istatistika ġabar l-informazzjoni tiegħu minn stħarriġ fost 4,000 familja dwar id-dħul u l-kundizzjonijiet ta’ għajxien tal-familji f’Malta u Għawdex. L-istatistika turi li tliet kwarti mis-sidien m’għandhom l-ebda piż fuq djarhom, filwaqt li l-kumplament għadhom iħallsu s-self li għamlu biex xtraw darhom. L-għadd ta’ familji li xtraw id-dar tagħhom matul l-2019 żdied b’madwar 3,300 fuq is-sena ta’ qabel.

Il-Ministru għall-Familja Michael Falzon qal li għal darb’oħra dawn iċ-ċifri wrew li Malta hija fost dawk il-pajjiżi li għandhom rata qawwija ta’ familji  proprjetarji ta’ djarhom.

Kien spjegat li aktar minn 58% tad-djar huma appartamenti jew maisonettes. Il-kumplament huma djar detached jew semi-detached. Il-parti l-kbira tar-residenzi fihom ħamest ikmamar.

L-istħarriġ wera li minn popolazzjoni ta’ 467,000, madwar 17,700 persuna ħassewhom li qed jgħixu fi djar relattivament żgħar għad-daqs tal-familja. Kważi nofshom huma kklassifikati li huma f’riskju ta’ faqar jew esklużjoni soċjali.

L-istatistika titfa’ dawl ukoll fuq kif il-familji jqisu l-ispejjeż tad-djar tagħhom. Fl-2019, ftit aktar minn 78% stqarrew li l-ispejjeż mhuma tal-ebda xkiel jew ta’ piż baxx, filwaqt li madwar 22% jħossu l-ispejjeż bħala piż kbir fuqhom.