Abela u Fearne bi protezzjoni mafjuża għal Cardona – Repubblika

Read in English.

L-għaqda Repubblika akkużat lill-Prim Ministru Robert Abela u lid-Deputat tiegħu Chris Fearne li qed joffru protezzjoni mafjuża lid-Deputat Mexxej tal-Partit Laburista Chris Cardona.

Fi stqarrija Repubblika qalet li x-xhud Melvin Theuma ta aktar raġunijiet biex wieħed jiddubita l-verità ta’ dak li qal id-Deputat mexxej tal-Partit Laburista Chris Cardona.

Ilbieraħ kompliet il-kumpilazzjoni tax-xhieda fil-konfront tas-sid tal-kumpanija 17 Black, Yorgen Fenech. Repubblika qalet li mix-xhieda jidher li Chris Cardona huwa “implikat bil-qawwi fil-qtil ta’ Daphne Caruana Galizia.”

“Melvin Theuma qal li jaf b’intermedjarju li aġixxa u ħallas f’isem Chris Cardona. U Melvin Theuma qal li jaf b’theddid magħmul mill-ħabib u kollega ta’ Chris Cardona, David Gatt, biex jgħinu ma jinqabadx għal dan il-qtil,” qalet Repubblika.

Skont Repubblika, il-kariga ta’ Deputat Mexxej fil-PL hija kenn u immunità mil-liġijiet.

“Tista’ toqtol jew tqabbad ‘il min joqtol u ħadd ma jista’ għalik,” qalet Repubblika.

“Iċ-ċaħdiet ta’ Chris Cardona m’huma konvinċenti xejn. Ix-xhieda ta’ Melvin Theuma tiżdied mal-indizji l-oħra li konna nafu bihom: Chris Cardona inqabad jigdeb aktar minn darba dwar ir-relazzjoni tiegħu ma’ Alfred Degiorgio il-Fulu. Il-partner legali ta’ Chris Cardona, David Gatt, kien akkużat (u ma nstabx ħati) tal-istess serqa li għaliha kien akkużat Vince Muscat il-Koħħu. In-numru ta’ Chris Cardona kien l-uniku numru, waħdu, imniżżel fuq ‘burner phone’ li ntrema’ mill-moll mat-tinda tal-patata, il-kwartieri tal-assassini akkużati li wettqu l-qtil ta’ Daphne Caruana Galizia,” qalet Repubblika.

Repubblika fakkret li Theuma huwa x-xhud fdat mill-istat. Qalet li jew jgħid il-verità inkella jmur il-ħabs u jħallas għal dak li diġà ammetta li għamel.

L-għaqda kkritikat ukoll is-silenzju tal-PM Robert Abela u tad-Deputat PM Chris Fearne.

“Għalqu għajnejhom qisu Chris Cardona kien akkużat b’xi ċuċata, li pparkja ħażin jew li għandu kont tat-taxxa b’lura,” qalet Repubblika.

“Dan is-silenzju, din l-omertà hi wkoll protezzjoni mafjuża. U meta din il-protezzjoni mafjuża tkun ġejja mingħand l-ogħla żewġ ministri tal-gvern, ikollna nirrikonoxxu li f’Mejju 2020 pajjiżna għadu dak li kien f’Diċembru 2019: stat mafjuż,” saħqet l-NGO.

“Jekk Robert Abela jiftakar x’inhu dmiru għandu jipproponi t-tkeċċija ta’ Chris Cardona mill-partit tiegħu illum,” qalet Repubblika

Ilbieraħ Matthew Caruana Galizia qal li filwaqt li Melvin Theuma kien qed isemmi lil Silvio Valletta u lil Chris Cardona beda jaħseb għalfejn il-maġistrat ma tordnax l-arrest tagħhom u biex issir tfittxija fil-mobiles tagħhom. Fuq Facebook it-tifel tal-ġurnalista assassinata qal li l-unika ordni li ħarġet il-Qorti kienet biex in-nies jilbsu l-maskri.

“Din x’sistemà ġudizzjarja hi? Waħda ħażina,” qal Caruana Galizia. Żied jgħid li l-Pulizija kellha tagħmel dan l-arrest mingħajr ma jkollha għalfejn tirċievi struzzjoni minn maġistrat.

Today in court, as Melvin Theuma said one astonishing thing after another, including that Silvio Valletta, one of the…

Posted by Matthew Caruana Galizia on Monday, June 1, 2020

Newsbook.com.mt għamel kuntatt ma’ Chris Cardona dwar l-allegazzjonijiet li saru imma Cardona ma weġibx.

Il-PN jistaqsi x’fih il-mobile ta’ Chris Cardona

Fi stqarrija l-PN staqsa x’fih il-mobile ta’ Chris Cardona.

Il-PN qal li l-mandant tal-assassinju ta’ Daphne Caruana Galizia qal li jekk jiġi fl-idejn “iwaqqa’ Gvern”.

Fl-istqarrija ffirmata mis-Segretarju Ġenerali Francis Zammit Dimech il-partit qal li għaddew 24 siegħa minn “xhieda kokkanti fil-Qorti”. Saħaq li Robert Abela waqa’ fil-muta.

Il-PN staqsa jekk hemmx xi patt bejn Robert Abela u Joseph Muscat, x’jaf Chris Cardona fuq Robert Abela, u jekk Abela hux se jitlob lill-pulizija tinvestiga lil Cardona u lil Silvio Valletta.

“Gatt qalli li jekk id-Degiorgios isemmu lil Cardona joqtolhom” – Theuma

Il-punti prinċipali tas-seduta tal-bieraħ:

  • Melvin Theuma jgħid li Chris Cardona kien jikkomunika mal-Fulu.
  • Theuma ftakar li darba kien ra lil Silvio Valletta fid-dar ta’ Fenech.
  • Theuma qal li darba Yorgen Fenech qallu li Adrian Delia kien mar jiekol għandu, iżda ma jafx jekk qalx hekk biex jiffanfra dwar kemm jaf nies.
  • Melvin Theuma qal li Yorgen Fenech qallu li Chris Cardona kien iddaħħal l-isptar wara l-assassinju tal-ġurnalista Daphne Caruana Galizia.
  • Theuma qed jgħid li David Gatt qallu li jekk id-Degiorgios isemmu lil Chris Cardona, hu (Gatt) kien ikun lest li joqtolhom.